Dwóch kolegów z jednej kopalni, co robiyli razem, miyszkali w jednym bloku. No, ale ten jedyn miyszkoł na parterze, a tyn drugi miyszkoł na piętrze.A oba byli jednakowo starzi w żyniaczce. Tyn dziesięć lot i tyn dziesięć lot. Tyn, co miyszkoł na parterze - dziesięć lot, ale niy było żodnych dzieci. A tyn, co miyszkoł na piętrze - tyż dziesięć lot po weselu, ale już mioł ich czworo.
No, i ta sąsiadka, co na parterze miyszkała, spotkała ta sąsiadka z piętra i sie jóm pyto:
- Suchejcie ino, sąsiadko, jak wy to robicie? Wyście sóm dziesięć lot po weselu, jo dziesięć lot po weselu - wy już mocie cworo dziecek, a jo jesce miy móm ani jednego, a tyż bych chciała coś mieć.
- Ja - pado. - Wiycie, co sąsiadko, to jo już niy wiym, to musicie sie mojiego spytać.
- No, ale wiycie, jo jest kobieta, jak jo mu to móm pedzieć?
- To przeca nic takiego! Powiydzcie mu, dyć przeca tyle lot sam miyszkómy.
No, i akurat tyn sąsiod z tego piętra szoł z roboty i ta sąsiadka go zastawióła. Pado:
- Słuchejcie ino, sąsiedzie! Wiycie, pytałach sie waszyj kobiyty, ale mi niy chce pedzieć, bo niy wiy, jak wy to robicie. Wyście sóm dziesięć lot po weselu, mocie cworo dziecek, a jo tyż jest dziesięć lot, a nic jesce niy mom.
- Ło! - pado. - To bardzo proste.
- To powiydzcie mi, co móm zrobić?
Tóż on pado:
- No, wiycie, idźcie se do drogerie, kupcie se taki fajny kawałek mydła. Kupcie se tyż taki fajny flakónik perfumów, no i kupcie szczotka ze sztylem.
- Ja, ale co jo byda z tym robióła?
- Nó! - pado. - Wiycie, jak przyidzie sobota, to sie tym mydłem fajnie wykąpiecie, bo przecaś łaziynka mocie, niy?
- Dobrze, a z tym perfumem co móm zrobić?
- Nó, z tym perfumem to sie cało natrzecie, co bydziecie fajnie pachnąć.
- Zrobia tak, jak godocie. Ale powiydzcie mi, na co mi ta szczotka z tym sztylem?
On pado:
- Nó, tym sztylem poklupiecie po suficie, to jo na dół śleza.
Brak komentarzy:
Prześlij komentarz